Diwani Masumbuko awahamasisha wananchi kujiunga na bima ya afya

DIWANI wa Kata ya Nyamatare katika manispaa ya Musoma, Masumbuko Samsonite( CCM), amewahamasisha wananchi kujiunga na mpango wa bima ya afya kupitia CHF iliyoboresha kuwawezesha kupata huduma bora.

Akizungumza kwenye mkutano wa hadhara uliofanyika kwenye uwanja wa shule ya msingi Nyamatare, Masumbuko amesema suala la afya ni mtambuka na ni muhimu kila mwananchi akiwa na uhakika wa kupata huduma.

Amesema CHF iliyoboreshwa na Mfuko wa Taifa wa Bima ya Afya (NHIF) itamuwezesha mwananchi kupata huduma katika zahanati,vituo vya afya na hospitali zilizopo mkoa wa Mara tofauti na mwanzo ambapo huduma zilikuwa zikitolewa kwenye halmashauri moja.

Masumbuko amesema mwananchi anapokuwa na afya njema anapata fursa ya kufanya shughuli za kiuchumi na kumuingizia kipato kitakacho muwezesha kujikimu ikiwa ni pamoja na kusomesha watoto.

Amesema baada ya kuboreshwa kwa huduma za afya kupitia CHF itawapasa wananchi kuchangia shilingi elfu 30 badala ya elfu 10 na kupata huduma kwa mwaka mzima.

" Ndugu zangu wananchi wa Kata ya Nyamatare mkutano wetu wa leo pamoja na mambo mengine lakini tunautumia kuhamasishana umuhimu wa kupata afya bora.

" Tusisubili kuugua tukaanza kuangaika kutafuta fedha za kwenda kujitibu naomba kila mmoja achukulie umuhimu na kuwa na kadi ya kuwezesha kutibu pamoja na familia,"amesema Masumbuko.

Akizungumzia masuala ya urasimishaji wa ardhi,diwani huyo amesema Kata ya Nyamatare ipo kwenye mpango wa kuwapimia ardhi wananchi na kuwaomba wananchi kuwapa ushirikiano wataalamu watakaofika kwenye maeneo hayo kwaajili ya zoezi hilo.

Kwa upande wa elimu amesema maboresho yameendelea kufanyika kwenye shule ya msingi Nyamatare kwa kukarabati majengo 4 ya madarasa na bado kuna majengo mengine 4 ambayo ushirikiano unahitajika ili kuweza kuyanaliza na kuwapa wanafunzi kusoma kwa nafasi.